Matthai 25:15 ah chun, “Suok pakhat kuomah talent nga a pêk a, suok dang kuomah talent hni, suok dang kuomah talent khat: an thaw thei tâwk ding ang sengin a pêk a”, tiin ei hmu anih. Chuong ang bawkin eini khawm Lalpa’n ei thaw thei tawk ding ang sengin talent ami pek ve a, thenkhat chu thuhril theina dam, inchuktirtu ni ding dam, rorel thiemna dam, mi hai thangpui theina dam, hlasak theina dam, music rem theina dam, thilpek ah rawngbawl tu ni ding dam, mipui rawngbawltu ni ding dam, mi hai ta dinga tawngtai pek tu ni ding dam, le thilpek chi dang dang a mi pek anih.

Hmar Christian Fellowship Bengaluru ah hin Lalpa’n rawngbawlna kawt lientak ami hawng pek a, rawngbawl dingin mi tin- a chin, a lien, ei rengin a mi ko anih (Rome 2:11). Khawvel po poah fe a, thil siemhai po po kuomah Chanchintha hril dinga a mi kotu chun, ei thaw thei tawk ding talent a mi pek ang peiin, a ropuina ding le ram lienna dingin ei talent hai sukpung veng ei tiu.