Jona chanchin hrenaw mang ei um naw a. Anachu, Jona chanchin a inthoka inchuk ding tak hi ei tiemfuk naw’m a ni ding ti khop hielin ei hringun khal dan hai hi Kristien nun le inmil thei derlo tam tak a um. Biekin sungah a chanchin thlawr hluom in Pathienin mawphurna a pek kha a hlen nuomnaw leia thununna a tuok thu ei hril hlak a. Jona tading bik a ei ngaithla hlak lei am a ni ding ei fak thei zawng tak ni’n an lang. Ei hringnunah hmang ding ruok chun harsa ei ti a, tam takin ei thaw thei naw hrim a nih.
Jona in Pathien thu a zawm naw le zawm nawk thu hi ei chei tak a ni hlak a. Amiruokchu, Jona hringnun nek hman in ei inchuk ding le hriet ding ni a inlang chu mihriem hai chunga Pathien in a zangaina, lunginsietna le hmangaina an langtir zing nuom a nih ti hi a lo ni lem dai a.
Exodus Bung 34 chang 6 na ei en chun ei Pathien hi “lainatnaa sip, mi lunginsietthei, lunginsen intak, zângaina le thutak hau, sâng tamtak chunga hmangainaa sip, khawhlona le bawsietna le suolna ngaidam hlak,” ti’n a mi hril a nih.
Mi ‘lunginsietthei’ ti hi a hrila hril chun thil intak ni der lo, amiruokchu a tak ram a thaw ruok chu harsa ei ti em em. Entirna dingin ei neka tangka sum tienga lo neinaw deu met hai chu awlsam takin ei zuk lunginsiet el thei a, anachu ei neka nei lem hai chungah ruok chu lunginsietna zuk nei chu harsa ei ti nawk lawi hlak. Lunginsietna hi mak takel chu a nih. A tawi zawngin hang hril ei tih – ei nunah kuhin Jona mizie ku kha thi ve el thei lo a nih. Ei nuom le nuom naw thu in mi ei lunginsiet in ei lunginsietnaw thei a lo ni zing a. Amiruokchu, Pathien in mi suizuiin a lunginsietna’n a mi en zing a; a angsunga cheng dingin a mi hnawt tawk tawk hi a lo ni zing an nawm.
Hner phen puma Pathien thu zawm
Jona chanchin kha a tak tak a ni a. Chuong ang bawkin eini dama um hai khawm ku hi ei chanchin hi a tak tak a nih. Jona angin ei tlanhmang a, Jona angin ei tawngtai a, Jona ang bawkin thu ei hril a, Jona ang bawkin hner phen pumin Pathien thu ei z’awm nawk hlak. Mak tak a nih ei mizie hi.
Jona kha Pathienin Ninevi khuo a fe a, thu van tlun dingin a tir ti ei hriet seng a. Iengthu am a na hril dinga a ti kha. Jona Bung 1 chang 2 ei en chun hieng hin Pathienin thu a pek a: “Tho la, Ninevi khuo, khawpui ropuitaka chun fe la, a chunga thu tlânginsampui rawh; an rîtlona chu ka hmaah a hung tlung ta si a…”. Pathien in ‘ka hmangai cheu a nih, in suolna haia intahwkin sim ta ro’ va ti dingin a tir der naw ti a chieng a nih. Chu nekin, an chungah a rorelna a’ntlungtir ding thu van tlun tir a tum a ni. Amiruokchu, Jona chu a tha a hrat chu ni naw nim, a lungrilah khawm thaw nuom dang, in le lo tungding le la hei lengkuol dam a nuom a ni el dim, Pathien thupek chu zawmlo in Tarsis tieng pan in a tlanliem tum ta lem a.
Leh, a reng a ramin Jona chanchin le mizie vawikhat a hang ngaituo vawng el thei khawm a ni naw leiin hi lai chen a inthok hin a mizie tulai Kristien inti hai hringnun la um zing hai hei thlir vat ei tih.
Entirna tha em em el pakhat-pahni hang tarlang ei tih. Ei nu le pa ha’n sawrkar fairel ring ve hai sien an mi ti leiin harsa sa sa in lekha an min chuktir a, a then a zarin sawrkar sin ei hang hmu a, lawm a um. Pathien kuomah ei theitawp in lawmthu ei hang thawnkai vung vung nghal a. Anachu, sin ei hang thaw tan hma a inthokin postingna ding hmun hai duthu aiang ei lo sam nghal a. Tam tak chun ‘fak le dawn le khawrsaw lak awlsamna bakah damdawi hmunpui hnai nisien’ ti’n Pathien kuoma ngenna ei la hang siem nawk tete a. A then chun ei duthusam ang takin khawpuiah ‘posting order’ ei hmu a, ei lawm hle hlak. Pathien kuomah lawmthu dawrzawn khat hang thawnkai harsa ei ti nawh a, Lalpa Ropuina thawlawm khom ei pek rin der nawh! Lawm a um em an nawm maw ei nuomna hmun taka um ding me chu! Anachu, ‘vangduoi’ leiin khawte ah ‘rural posting’ a then in ei hang hmu a. Khawpui a posting vawng dan um nghal lo chu! Sorkar in khawte a fe dingin order a mi pek ta khomin MLA, minister le department lu hai biek tha a; ei sinthawna tieng pannaw dan ding ei zawng hlak. Sin ei zawng lai khan Pathien kuomah sin mi pe dingin ei hni thlut thlut a. Nisienlakhawm, a mi zuk pek zet pha chun, Pathien thilpek ah ei ngai bek ta nawm a ni ding, sorkar order ku kha zawm naw dan ding ngawt ei ngaituo el hlak a nih. Jona anga mi hai kuoma Pathien lungsen rorelna thu intlung ding khawm ni lo me. Chu nekin mipui hmasawnna le lawm zawng thaw dinga tir ei ni a. An mi lo lawm ding vei leh! Eini a um Jona mizie kha a hung lien lem nawk hlak. Chuong ang bawkin khawpui a posting hai khom khawte a tir ei ni pha chu aw, a fe nuom lo tam tak ei um el hlak a nih.
Thaw ta laklaw, la hei sui sei nawk met ei tiu. Kohranah khawm hin pastor hai hi Jona mizie nei ve tho an ni leiin posting tha le hmun inhawi a um an nuom ve hlak tho a nih.A then chun hotu ha’n khawte le tlangram a pastor sinthaw dingin mawphurna an hang siem hin lungawi takin hotu thu chu Pathien remruot a ngaiin an zawm a. A then chun inhremna angin an ngai a, hner pheng pumin hotu hai thu an hei zawm hram hram a. A then chu fe tum nekin an hner an phen a kohran dangah an inchawm lut dei hlak. Khawvel sorkar sin chu hril lo, Pathien ram rawngbawl ni bawk si in, Jona angin puonthu zielin Tarsis khuo tieng intawllut a lo awlsam lem chu ning a tih.
Gospel mansapui inbangna tia ei hril vung rak rak hlak ram – Manipur Hmar tlangdung – khawm ku hi khawvel tienga hmasawn ding angin thil a fe theinaw nasan chu eini lei tho a nih. Jona mizie eini a um hi a hrat ve em leiin mani hmasielna le inhawi tina zawng seng ngaituo in hun ei nun ei hmang ve hlak. State sorkar thawktu khi lai rama sinthaw dinga thupek dawng 100-ah 65-70% hi Hmar le tlangmi ei Kristien chanpui hai an nih. Amiruokchu, sorkar in sinthaw dinga a mi tirna tieng pan nekin, khawpuiah thang ei khaw a, ei aia thawktu ding dam ei zawnga, chuongkuchun ei khawsa mei mei nawk hlak a nih. Ei chungah sorkar le sin ei neina dinga ei tawngtaina hai dawntu ei Pathien hai khawm an lawm ding le lawmnaw ding khom ei ngaituo ta ngai le. Inzak inphak khawm ei dawn ngai ta si nawh. Tarsis khel rak khopin ei tlansie a ni el an ta nawm a nih!
