“Amiruokchu hi thil pakhat hi ka thaw hlak, Hnungtienga thil um hai chu theinghila hmatienga thil um hai chu banin, Krista Isu Pathien chungtieng kona san lawmman hmu dingin, tiemchin tieng ka pan tal tal anih” (Philippi 3:13-14). BSI
Thuhma:
Kar hmasaka ei beiruol subject lesson 2 khan “Tuorselna le Ringtu Nun” ti ei lo inchuk tah a. Vawizan ei beiruol a zan thumna Lesson 3 na ah hin ei Thupui “Tuorselna” ti hmanga ei inchuk thlang ding chu “Tuorna San le Lawmman” ti anih. Ringtu nuna fiena dam, tuorna dam le sukdudana dam ei tuok le ei tuor hai hi Pathienin ami lo phal pek hrim an lo nih (Johan 15: 19-20). Iengkim hi Pathienin a san neia a siem vawng an niha, san nei lova siem khawvela hin iengkhawm a um nawh(Thuvarhai 16:4, Thuhriltu 3:1).
Ei tuorna san.
i) Lalpa thununna (Discipline) a min chuktir. Hebrai 12: 5-7
“Ka nau, Lalpa thunanna chu ngainep nawla, A kawka I umin inthlada bawk naw rawh; Lalpa chun a hmangai chu a thunun hlaka, Nau a ilawm taphawt chu a vuok hlak I sawnnaw.” ti hi. In tuor hi nangni thununna ding anih; nauhai chunga thaw angin Pathienin in chungah a thaw ani hi; pa thunun naw nau tu am a um hlak a (Hebrai 12: 5-7). BSI Thunanna chun ra tha tak an suo ngei hlak. Pa in nau a ilawm taphawt chu a thunun hlak. Pathien khawmin a nau, a ilawm taphawt hai chu ami thunun hlak, ama ei ang nawkzuol theina dingin.
ii) Thuawina (Obedience) a min chuktir. Hebrai 5:8
“Naupa rau ni sienla kawm a thil tuor haia chun thu awi an chuk tah anih; (Hebrai 5:8) BSI Lalpa thutiem hai(promises) dawng ding chun, a tiemtu thu thua um atul. Thutiem dawngna dinga pawimaw tak chu Lalpa thuawina hi anih.
iii) Inngaitlawmna (Humility) a min chuktir. 2 Korinth 12:7-10
“Chun inhriettiena hai chu a nasa bek bek leia kan ngaihlu taluo nawna dingin tisaah hling ami pek anih. Setan tirko, kut inthak nulna a mi hmangtu ding chu; chuong naw chun inngaihlu taluo rawi katih(2 Korinth 12:7). BSI “Chuleiin, Krista leiin hratnawnaahai, sietnaahai, hnengdenaahai, suknawmnatnaahai, hnawchepnaahai, ka lawm hlak anih, ka hrat naw po leh ka hrat hlak a nih” (2 Korinth 12:10). BSI
Tirko Paula meu khawmin, a varna le a thiemna hai tamtak suong ding nei sienla khawm, Krista leia a rinum tuorna hai, a harsatna tuok haia, a taksa hratnawna hai dam popo chu a hringnun a inngaitlawmna inchuktirtu ah a ngai a, chuleiin, “ka hratnawna hai chu suong lem tang ka tih”, alo ti thei anih (2 Corinth 12:9). Tirko Paula inngaithlawmna ang hi eini ringtu hai khawmin ei va pawimaw ngei de!
iv) Unau hai tuorna intawmpuitu hai ei nih. Hebrai 10:34
“Kawlbun hai chu in lainat a, thil tha lem, um sawng bawk ding chu, maniin in nei ti hrein, inthilneihai lakpeka in umnaa kawm lawm takin in lo tuor tah a (Hebrai 10:34). BSI Kohran hmasa hai khan suknawmnatna nasatak an lo tuora, hnawtdara umin an in le lo hai
tlansanin, an thil nei hai chen khawm lakpeka umin, Krista hmingin a lo tuora, mi tamtakin an hringna hai chen khawm an lo chan tah anih (Rom 8:1-3), (Matthai 24:9). Krista hming leia ei tuorna le ei rimsikna tuor hai hi, ringtu tamtak lo tuortah hai tuorna intawmpuitu hai ei ni leiin, ei tuorna hai a inthawk khawmin lawm takin ei tuor pei ding anih, ei lawmman ding chu a kuomah a um sia.
v) Krista tuorna intawmpuitu hai ei nih. Philipi 3:10, Hebrai 13:13, 1 Peter 5:1,
“Krista le a thonawkna thilthawtheina chu kan hriet chieng theina ding le a tuornahai inthawmpuia, a thina ah ama ang ka hung ni theina dingin (Philippi 3:10). BSI Chuongchun, ama an hmusitna chu phurin kawhnawmah a kuom tieng fe suok veng ei
tiu(Hebrai 13:13).BSI Krista Isu’n ami hmangaina nasatak leiin rinumna tinreng a tuora, kross chenin, ei ta dingin ahung thi anih(Rom 5:8). Eini khawm ama ta dinga rinum tuor hi ei thaw ding reng anih(Hebrai 13:13). Krista tuorna intawmpuitu hai ei ni leiin ei hamtha bek bek, a ropuina khawm ei intawmpui ding anih sia(1 Peter 4:13).
A lawmman.
i) Nungchang nghet (Character) a siem. Rom 5:4
‘Tuorselna chun Nungchang Nghet a siem,(DV)’ Rom 5:4 Ringtu nuna fiena dam, tuorna dam le sunawmnatna hai hin nunchang(character) nghet a mi siem pek.
ii) Beiseina (Hope) a siem. Rom 5:4
‘Nungchang nghet chun beiseina a siem ti ei hriet si a, (DV)’ Rom 5:4
‘Beiseina chun lunghnuolin ami siem ngai nawh’(DV) Rom 5:5
‘Beiseina chun ami sukbeidawng ngainawh’ (DV) Rom 5:5
Mihriem hai hin ei hringnun ah beidawng chang dam, hratnaw chang dam, nat chang dam le chau chang ni hai dam ei nei hlak. Beiseina neinaw mi chu, hring zing sienkhawm, thi ang chau el anih. Saptawngin, “To live without hope is to Cease to live” an lo tih. Beiseina neilo hringnun chu, hringnun lungsietum tak anih. Chuleiin, mihriem haiin khawvela ei hringnun ah ei mamaw bek bek el chu beisena(Hope) hi anih. Beiseina hi Pathiena inthawka suok anih (Psalms 62:5). Biblein, thil pathum, um zing ding a hril hai laia pakhat chu ‘beiseina’ hi anih (1Cor.13:13).
iii) Vana Lawmman (Rewards) hmu ding hai ei nih. Hebrai 11:26
“Krista an hmusitna chu Aigupta ram rohai nek chun sum ropui lemah a ruot a, lawmman pek ding chu a thlir hlak leiin (Hebrai:11:26). BSI
Tirko Paula chun, ringtu nun hi kawvela inruolsiekna(Sports) leh alo tekhi anih (1 Korinth 9: 24-26). Ringtuhai chu lawmman hmudinga inruolsieknaa tlan ang ei lo nih. Mosie ngei khawm chun, Krista an hmusitna chu Aigupta ram rohai nek chun sum ropui lemah a ruot anih kha, a lawmman ding a thlir thlat leiin (Hebrai:11:26).
Hla siemtu chun hieng ang hin a lo hril:
“Kross bula thlarau ei hung thuoi lut tah hai le,
A huonga beram ei khum hai chu,
Ei lallukhum sukmawitu la hung ning an ta,
Rangkachak khawpui mawitak ah chun.”
Pathien rama ei rawngbawlna hai le ei rawngbawlna ra hai chu, nakie leh ei lallukhum sukmawitu la hung ni ve ngei an tih (2 Timothe 4:8). Van ah ei lawmman ding thlir zing pumin ei inruolsiekna ah hin sel takin tlan pei ei tiu(Philippi 3:14).
iv) Aropuina (Glory) chang ve ding hai ei nih. Rom 8:18, 1 Peter 4:13
“Tulaia tuorna hai hi ei chunga ropuina suklanga la um ding le chun hrilkhi khawpa ka ngai si nawha(Rom 8:18). BSI
“Krista tuorna hai tuorpuituhai in ni zie ang peiin lawm lem ro; chuongchun, a ropuina a hung
inlang pha chun nangni khawm hlim takin lawm thei in tih(1Peter 4:13). BSI
“…ro hluotu hai, Pathien rohluotu, Krista hluopuitu hai ei nih…(Rom 8:17). BSI
Vanram ei tlung pha chun, thina le natna hrim um tanaw niha, ei inthiengnawna hai, ei natna
hai le ei rinumtuorna hai popo chu lakhmangin um tanga ata, sukdanglama umin, ropuina chu
ei chang ve ngei ding anih(1 Korinth 15:52)
Thukharna:
Kristien hringnun lampui hi lampui tlun rawng le inhawi rawng vawng anih nawh (Matthai 7:13). Harsatna le thlemna tamtakin a mi hmuok hlak anih (Jakob 1:2), (Peter 4:12). Tirko pawla chun Timothe kuomah chun, Krista Isu sipai thatak anga rinum tuorpui rawh, tiin a fiel (1 Timothe 2:3). Isu Krista chu, a tawpna chena tuor pei taphawt chu, chu ngei chu sandamin um atih, alo tih anih (Matthai 24:13).
Tirko Paula angin, hnungtienga thil um hai chu theinghila, hmatienga thilum hai chu banin, Krista Isua Pathien chungtieng kona san lawmman chu hmu dingin, tiem chin tieng pan tal tal ei tiu (Philippi 3:13-14).
HRILTLANGNA/ DISCUSSION:
1. Hla siemtu chun,
“Rinum, thlemna ka tuor lain,
Hlingin ka ke an huol vel lai,
Lungril taka ka ngaituoin
Lalpa imi ngaituo… alo tih.
An nawleh nang teh rinum,thlemna hmun ah ‘Lalpa i mi ngaituo’ i tih thei ve am? I hringnun ah rinumna dam, thlemna dam le harsatna dang dang i tuokhai kha ngaituo la, i lungrila zawna (Question) lientak Pathien le in inkara in suolpui/buonpui hlak chu iem ana? I tuorna kha Pathien le in inkar sukhlattu a an chang am? OR Pathien le in inkar sukhnaitu ah an chang hlak?
