By Pastor R Lalremruot Hmar
‘Inngaihlu taphawt chu tlâwm an ta; inngaitlâwm chu chawimawiin um an tih’ (Luka 14:11)
Inngaitlâwm ei ti hin, inngaisiet amani, inngaihnuoi ei tina ani naw a; mâni neka mi dang ngai pawimawna le Pathien sie chunghnung tak na tieng a kawk lem. Inngaitlâwmna hrilfiena dinga ṭha tak chu ei Lalpa Isu nun hi ani. Ama chun, a ropuina po po mâk sanin, mihriemhai ban phâk in a hung insuktlâwma, ei intlanna din; Pa thu awiin krawsah a hung thi ani kha.
Ei Lalpa Isu hi inngaitlâwm ani leiin Ama intuokpui ding chun lungrila inngaitlâwm a ṭul a ni. Inngaitlâwmna hi Pathien thu ani ang hrim in lukhâwng a nei hle bawk; Ei bible chun, ‘Inngaitlâwmna lâwmman chu hausakna dâm, inzâkaina dâm le hringna a nih.’ a ti hiel ni (Thuvar 22:4).
Inngaitlâwmna letling chu chapona hi ani. Pathienin inngaitlâwm a lâwm ang tlukin chapona hi a theida a, a kal tlat a ni (1 Pet 5:4). Chapona hi suol, Setana inthawk suok, mihriem nun sukse tu le Pathien hmel hlie tu ani bawk. Chuleiin ringtu ha’n, Isu hnung ei zuina kawnga ei pawimaw tak laia pakhat chu inngaitlâwmna nun nei hi a nih. Piengthar nun ei ti le chapona hi, thil in-âihal, um kawp ngailo ding a ni leiin, ringtu indik tak chun, nitin mâni inhnâwlna ramah kal a chawi hlak ding a nih.
Mihriem hi ei piengphung rengah; mâni tâwka indittawk, hrie inti le chapo awl ei ni leiin, chapona hi mi lien le hausahai lai chua a thawk naw a, mi invêtah a thawk na ting lem a nih. Mi chapo chun, “Ka” ti thumalin bul an ṭana, mi neka ṭha bik, hre bik, thâwbik, nei bikah an ngai a, mi an ditkhawp naw a, sawisel ding an zawng zing hlak. Amiruokchu mi inngaitlâwm hai chun, mi tlin nawna ringawt hre loin, an ni khawm, an nunah fel hlelna le bâk an nei ti an hriet ve leiin, mi an sawisel mei mei ngai nawh.
Mi tu el khawm hi; ditsakna dâwkâna ṭhunga, hlawtlingna nopui dawma, ţhuoitu ngirhmunah an um pha chun, mâni tawkah ropui ta vieu a inngai a awl hlak. Amiruokchu, chuong ang ngir hmuna khawm chun ei hriet zing ding chu; chapona hin mi a chawimawi ngai naw a, inzâ kai nawna le tlâksietna bul lem ani ti hi a nih. Khawvelin mi ropui ei ti hai hi mi inngaitlâwm tak an ni rawp hlak, Lal Isu ngei khawm hi, inngaitlawm taka ranthlȇnga pieng, chawimawi nia sabengtung chunga chuong le inngaitlawma thi chena Pa thu zawm a nih.
Ieng angin hausain, thil thawthei inlakhawm, ei neka var le hre lem tamtak an hung um pei ding ani, sin insang tak chelin ngirhmun ropui taka um inlakhawm, ei sin ei chawl huna le, thina in ei mit a sien hunah, khawvel hi ei boin pangai takin ala fe pei thei a nih. Khawvel hin a mi mamaw naw a, ei ni hin ei mamaw lem ani. Chuleiin chapo thei tukhawm ei um nawh. Lal Solomon meu khawm, a ropuina po poa an thuom khawmin, tûktinpâr tluk khawma cheiin a um nawna khawvela hin, chapo thei ei ni nawh. Ei ropuina tak khawm misuol, lunginsietna zara sandam ei nina hi a nih.
Ei bible chun, ‘Lungril chapohai chu Lalpa’n a tirdak a, hremna pumpel naw tawp an tih’ (Thuvar 16:5) a ti ani kha, chuleiin inngaitlâwm le thuhnuoirawl takin Lalpa rawng hi bawl ei tiu. Amen
(29 June, 2025)