By Pastor R Lalremruot Hmar
“Iengkhawm ni sienla, in um dân chu Krista Chanchin ţha leh inmawi phawt raw se.” (Phil 1:27a)
Ringtuhai hi, ni tina ei khawsak dan le um dan haia hin, Pathien le mihriem mit hmua mawihai ngaituoa khawsak ding ei ni zie bible chun ami hrila (2 Cor 8:21). Amiruokchu tulai ringtu tamtak hin mihriem mit hmuah ei mawi phawt chun, ei dittawk el am ani ti ding hin a um a, a pawi em em a nih.
Lang lo rama ei nun dan po po hmu tu; Pathien hmaah hin; ei ngaituona po po le, khawsak dan hai hi iengkhawm thup thei a um naw a, chuleiin mihriem mit hmua, inlangmawina neka pawimaw lem chu Pathien mit tlung a khawsak hi a nih.
Peter le Johanin mipuihai kuoma chanchintha an hril leia vantlâng hotu; thiempuhai le Sadukaihaiin an man khan, huoisen takin roreltu hai kuomah “Pathien mithmuah nangni thu zawm am, Pathien thu zawm an dik lem ti nangni inngaituo ro” (Acts 4; 19) tiin mihriem suklawm nekin, Pathien lawmna chu ieng dang neka an ngaipawimaw thu an hril ani kha.
Mihriem lawmzawng chau en a rawngbawl ei ni chun, ra insuo ngai naw mei ni a, ei inrimna hai po po khawm, a tlawn el ning a ta, ei Pathien khin, ei rawngbawlna mi hre pui ngai bawk naw nih. Ei bible bawkin “Mihriem suklawm tumtu ang ela an hmu lai chaua thaw loin, Krista bawi ni awm hrimin lungril takin Pathien ditzawng thaw unla” (Eph 6:6) tiin ami hril a ni kha.
Ringtu kalchawi nunah hin Pathien neka mihriem ei hmu lien lem pha ei suk suol rawp hlak ding a nih, “mi hai ngaidan ni naw pal atih” ti ngawta thudik khawm tan ngam lo hi, ringtu puitling nun dan ding an naw a, ei Pathienthu chun, thudik tana huoisen taka ngir det dingin ami dit a nih. Mihriem mit hmua mawinaw ei inlau taluo naah hin ei Pathien pawi thaw pal ei tih ti inlau a um em em lem anih.
Khawvela hin mi popo suk lawm thei an naw a, mi dang hai ta dingin nasa takin luong suokin inpe inla khawm, mi fa thei lo tu le ei thilthaw phawt sawisel tum tu an um zing thei. Amiruokchu chuonghai leia kal pen suk chau ding ei ni naw a, chu nek hmanin Pathien ei hnai sau sau lem ding anih.
Pathien thu ei ţan leia mi hai mi sawiselna le demna chu iengkhawm lo ni sien… an mi sawiselna le demna hai chu thu dik ani chun, in enkir na’n hmang inla, insiemtha in la, an diknaw ani chun hun in la hung hril tho a tih. Misuol le mi tha, ei renga ei tawpna ding chu Pathien a nih. Chuleiin, a pawimaw tak chu ni tina ei um dan hi Krista chanchintha leh in mawi phawt raw seh. Amen.
(Bengaluru, 30 March 2025)