By Pastor R Lalremruot Hmar
I bulah lawmna a kim a, I chang tieng chun inhawina, chatuonin a um si a. (Ps 16:11 DV)
reels le status tamtaka hmelṭha, hlim le inhawi ti hmelput hai hi; a puonzar hliah hin ei lung awi-in ei hlim chie am?…
Spider-Man 3 a, zei taka news reporter role changtunu, nunghak hmelṭha, actress le model, Lucy Gordon kha nuom tinreng chêna, a hlawtling vanglai takin, an khaihlum thuta, mi tamtak a barakhai chieng hle…
Mi ha’n ‘hmangaina khawpui’ tia an ko, Paris ah khun a ngaizawngpa Jerome leh In ropui taka an chênga, a nuom le dithai nei thei dingin sum tamtak a nei bawk, amiruokchu Isu ṭhanglo nunah khan, hausakna le hming thangna hai khawma, lawmna le thlamuongna indiktak an pek thei naw leiin, a kuomah, a hmangaitak Jerome chêng zing sienkhawm, a sungril ruok hluokhattu ding neiin an hriet nawa, a hringna a lak ta ringawt ani kha, a pawi em em a nih.
Mi tamtakin Isu ṭhang loin, hlimna le lawmna, inhawtirna le nuomsakna hai an zawng hlak a; an dai suol rawp hlak. Hlimna mi pe thei dinga ei ngai tamtak ah hin hlimna le lawmna tak tak a um nawh; paisa, sum le pai, rothil le hausakna hai khawm hin* hlutna nei de hai sienkhawm, hlimna an châwk thei chuong nawh.
Car manto, In ṭha, phone le gadget dang dang hai khawm hin, hluta le ṭangkaina neiin, awl-samna mi pe hai sienkhawm, hlimna an sawm kher nawh, a ṭhenin; zu le saah dam, nuhmei pasalah dam, inkhelna hmuna dâm, hlimna an zawnga, sienkhawm beidawngna le muolphona bak an hmu ngai nawh. Asanchu a um nawna hmunah an zawng hlak lei a nih; chuleiin, hlimna le lawmna indiktak chu Isu kuoma chau a um a nih.
Ṭhangthar khawvelah hin; hlunlo thil le lemchangna a hluor ta em em a, digital khawvela hin hang dâk la; mi tin hin, hmun mawi le changkang ta phawta inthê para, ei thil nei ṭha hai, pholang in, ei nina bâka, inhawi le hlim anga inlangtir ei tum seng am ani ti dingin a um. Pathienni le Ni-puiah hai lem hin chu a Pathien chawimawina ri nekin, mi’n nal le mawi mi ti hai sien ti hi, ei status ah an ring lem hlak. Applications hrang hrang hmangin hmelsie hlak ei um meu ta nawh, reels le status tamtaka hin, ei fel a, ei fak a changkang a, ei hlim em em bawk. Amiruokchu; a puonzar hliah hin ei lung awiin ei hlim chie am?
Thilmak deu el chu, tulai ṭhangthar, hmelṭha le hlim hmelput hai lai hi depression le stress a hluor em em si hi anih. Chuleiin lemchangna le mani inthiemchawpna nunah hin hlimna tak tak a um naw a, Isu kuomah chau, lawmna kumhlun a um ani ti hi, Psalm ziek chun mi hril a nuom a nih; “I bulah lawmna a kim a, I chang tieng chun inhawina, chatuonin a um si a.” ti in.
Hausakna dâm, ropuina dâm, insangna dâm, hriselna dâm le thil dang dang; vawisuna ei duthusam tamtak hi, mi tamtakin an nei, amiruokchu chuong hai khawm chun, hlimna le lawmna hi a hranin an la zawng tho anih. A ṭhenin an rem hriet danin hlimna an zawnga, sienkhawm Isu ṭhanglo a, hlimna zawng tu hai chun muolphona le beidawngna bak an hmu ngai nawh.
Vawisuna, nun inhnar um, mi hlim thei, iengkima lungawi thei ei ti hai chu; Pathien neitu hai bawk hi an nih. (Phil 4:12) Tukhawm Pathien hnungzui insîr an um ngai naw a, Isu ṭhangloa hlimna le lawmna zawng hai bawk hi a beidawng hmasa le insir an ni hlak. Chuleiin, hlimna le lawmna indik tak chu Isu kuoma chau a um a, chu chu an chawka inchawk thei an naw a, Isu mi pek ding ani lem. Ama chun tukhawm a hnar ngai nawh, “Hni ro, pêkin um in tih; zawng ro, chuongchun, hmûng in tih..” ti ani kha (Mat. 7:7) Amen.
(Bengaluru, 2nd March 2025)