By Pastor R Lalremruot Hmar
(2 Lalhai 4:26)
Puotieng ena ṭhâ le mawi em ema inlang si hin, suongtieng alo inphâr thei a, hmelṭhatna le ṭawngbau ṭha phêna khawm hin lungril a lo se thei, chuong ang bawkin, dam hmelput si hin, natna rûk a lo nei thei a, chawlni zâta biekin kai zing si khawm hin, thlarau damloin a um thei.. Chuleiin vawisun hin, I lungril takin nang le nang hang inzâwt la; I thi phâ, I thlarau khawlam fe’ng ata? Thi thlamuongna hi I nei tâm? I thlarau a dam chie am? Hi zawna pawimaw tak hi ei rengin, nikhat chu ei la fethleng seng ding a ni.
Sunam khuoah zawlnei Elisa tlungin nu, nau neisun a thî khan, hi minu ringna ropui zie kha ei hmu a; mihriem ngaia ding chun thina hi a tawpkhawk nisienkhawm, ama chun thina inhnê tir ni a nuom naw a, mâni inlunginsieta ṭap le indawm kûn el loin; a puonvel a siemṭha a, Pathien mi umna Karmel tlâng a pan vang vang lem a ni. Chuleiin, thina le hringna chunga thuneitu Pathien thilthawtheina a hung in langa, a insungah damna a tlung nawk ani kha.
Hi khawvela, ei dam khawsuok ve na dinga ei bei nasat zie hi I ngaituo hlak am? ruol ei ang theina dingin ei hma zawn sengah sin ei thaw a, hâdam hman loin kâr tlûonin ei buoi a, ni le thla a liem, kum a hung thar, sienkhawm neisa ringa chawl thei ni chuong lo, a ngai bawkin ei pu nawka, fak le dawn, sil le bil, khawsakna ngaituo reng rengin ei damlai ni ei hmangzo a ni tak, nu le pa ngirhmun anthawka ei hang tlir lem chun, ei theina po po; nauhai le insung ta din ei seng phal a, natna in ami hang tlakbuok lem hi chun, nei baka taikuong inkhup rak khawpin ṭhang ei lak hlak.
Nisienlakhawm hieng po po hi damsung ni a ding chau ana, ei thi le inruola bo el ding an ni, chuleiin damsung tawite a ding hmana hieng khawpa ṭhang ei lak chun, thi hnunga ei thlarau damna ding hin ngaituona seng, ei va pawimaw nasa de… Eini hi ei dam chieng am? ei pasal hai an dam am? ei nuhmei hai an dam am? ei nauhai an dam am? ei insung a dam am? ti hai hi ei ngaituo dinga pawimaw tak a nih.
Pathienthu in, “Nang I dam am? ami ti hin, diabetes i nei am? I BP an sang am? thâ-na I nei am? I cholesterol an sang am? I khuo asik am?” tiin amin dawn naw a, “Isu I nei tâm? I thlarau a dam am?” tiin ami dawn a nih lem. “Thlarau damlo natna hi; natna dang angin anthîp ve ngainaw a, mi arei ngai bawk naw,” amiruokchu an vawihai chun, lungril ruk taka thlamuongna an nei ngainaw a, lem chang nunah an chêng leiin nun chawlna an nei ngai nawh.
Chuong ang ngirhmuna um hai ta ding chun, ei lalpa Isu’n a tlawnin, sandamna a pek a, chu chu thilthaw lei khawm ni loin, lunginsietna zara ringnaa chang a nih (Eph 2:8). Pathien chun tukhawm a kuoma damna zawng hai ahnar ngai nawh, “Dangchâr taphawt hung unla, hung dawn ro; paisa nei nawhai khawmin, a thlawn in hung dawn ro” (Isa 55:1), a mi ti lem a nih. Chuleiin ei sandamtu Isu ngei chun, “Kei hi hringna bei chu ka nih; tukhawm ka kuoma hung chu a phîng ṭâm ngai naw ni a, a mi ringtu chu a dang châr ngai bawk naw nih” (Jn 6:35) a ti a nih. Chuleiin hringna tui kang theilo le hringna bei Isu hi, i damna din a tlawnin lo chang ve rawh. Amen.
16th March 2025