By Pastor R Lalremruot Hmar
Mihriem hi ei piengni a inthawkin, kum ei tling hmakhat; nî tin, thla tin, kum tinin ei in ṭhang hlak, mi tukhawm an ṭhang thei naw chun; pieng phunga ruol ban lo, piengsuol ei ti hlak.
Chuong ang bawkin ei Pathienthu khawma; ni tin, Krista lunginsietna le hrietnaa in ṭhang dingin a mi ti a ni (2 Pet 3:18). Krista angna neia inṭhang lien ve theilo hringnun hi ei bible bawkin ‘felna thua hrietna nei lo’ a ti a. _(Heb 5:13)._ Chuleiin, felna thua hrietna nei lo na na na chu ringtu puitling lo ti na a nih.
Mihriem kum 18 le a chungtieng pêl ta hai hi; kohran le khawtlang khawma, mipuitling, mâ nia thuthlûkna siem thei lai ei zel hlak, amiruokchu puitling sunday schoola hming ziek hnung khawma, ni tin fâk ding inbâ ngai zie ta ang hai sien, tûk tin; sil-le-bil inhâktir ngai bawk hai sien, an fe na taphawtah chel bât ṭul ta ang hai sien chu; tukhawma mi pangai lai tiemsa kher naw ni hai…
Ei ni khawm; Christien sungkuoa seilien, naupangte an’thawkin Pathienthu inchûktirna dawng hlak ei ni leiin; ei nuna Lal le sandamtu dinga Isu ei pawm ni kha sâwtfe ta dingin ei hang ringa, Chuleiin vawisun hin chu, ringna rama mi hai entawn tlâk, mi puitling le in chûktirtuhai ni awm ei ni tah, chuong ang ding chun ei Bible khawma ami beisei hrim a nih (Heb 5:12).
Chuleiin, ei ring phut hun kha ngaituo chun; vawisun hin chu; khârsâwng theology a innghat hmel ei put ta naw a; chu nek hman in, ma nia inhaiku thei ringtu; thlêmna le suolna tuifawn chunga khawm nghet taka ngir thei, mi puitling ni awm ei ni tah. Ringnaa mi puitling hai chun; mi thuhril ringawta innghat loin, mi ṭawngṭai pekna ringawt nghâk bawk loin; mâni in, Pathien an bêla, Bible tiemin an ṭawngṭai rawp hlak a, mi mitmei veng lei ni loin Pathien ṭi na le inzâna leiin A rawng an bawl ta lem hlak a nih.
Chuleiin vawisuna, ringna rama ei ngirhmun indik tak hi, hang insui nawn inla ei nuom a nih. Talent khat kawltu, a kawl ngâi ngâia, sukpung lo pa kuoma, Isu’n, ‘Suok suol le zâwmthawpa kha, tuol tieng inthima chun pei dawk ro’ (Matt 25:30) ti a, lawm lo taka a hril ang khan, ringna rama hin hma tieng pan theilo le inṭhang lien loa ei la um zing chun, ei Pathien khin, iengtin am mi ngai ata? ti hi zawna pawimawi tak a nih. “Chuleiin, ringnaa kal ei chawi mek na nun a hin, inṭhangin ei in hriet am? ei ring phut lai ang khan ei la um zing? an naw leh, ei ring phut lai nek khan ei inhnuoi deu deu? ti hai hin in ennawn rawp hlak ding ei nih.
Kar khatah bu vawikhat chau fa ta ang inla, inṭhang chu hrillo, ni tin in, châu tieng pan ngei ei tih. Chuong ang bawk in, ei thlarau inṭhang lienna din nikhata vawi iengzam Pathien ei bel hlak a? ti hi zawna pawimaw tak a nih. Ṭawngtai ngai lo, Bible tiem ngai lo, nun uluk bawk lo, inkhawm inthladâ bawk hin Christian ṭha an um awm si naw a. Kum 30/40/50… pêl rak ta khawma ringna kal chawi naa inṭhang lien le, puitling hmel ei put naw chun, Pa kuomah, ngaingam takin inlawi ngamnaw ma nih. Chuleiin nitin Krista angna neia inṭhang lien pei ding le chungtieng Pathien kona san lâwmman hmu dingin, tiem chin tieng chu pan ṭâl ṭâl ei nih. Amen.
(Bengaluru, 23th March 2025)